អំពីសមាគម

ទស្សនវិស័យ៖ ស.ឈ.ឧ.ក. ជាសមាគមអព្យាក្រឹត មិនស្វែងរកប្រាក់ចំណេញ មិនប្រកាន់ពូជសាសន៍ មិនប្រកាន់ សាសនា មិនប្រកាន់និន្នាការនយោបាយ មិនធ្វើនយោបាយ មិនធ្វើជាឧបករណ៍របស់គណបក្សនយោបាយ ក្នុងនោះមិនផ្តល់ជាសម្ភារ ហិរញ្ញវត្ថុ ធនធានមនុស្ស គាំទ្រគណបក្សនយោបាយ ឬបេក្ខជន ឬអ្នកគាំទ្រណា មួយឡើយ គឺសមាគមបម្រើផលប្រយោជន៍របស់សមាជិក និងជាដៃគូររបស់រាជរដ្ឋាភិបាលក្នុងកិច្ចសហការ ល្អដើម្បីអភិវឌ្ឍសង្គម។

ចក្ខុវិស័យ៖ សមាគមឈ្មួញជើងសាឧបករណ៍និស្សន្ទនៅកម្ពុជាស.ឈ.ឧ.ក. ត្រូវបានបង្កើតឡើងក្រោយពីច្បាប់មូលបត្ររដ្ឋ និងច្បាប់ស្ដីពីការបោះផ្សាយ និង ជួញដូរមូលបត្រមហាជនបានអនុម័តរួច។ ស.ឈ.ឧ.ក. មានគោលដៅក្នុងគោលបំណងចូលរួមចំណែកដល់ការអភិវឌ្ឍសេដ្ឋកិច្ចជាតិ និងសង្គមតាមរយៈការកៀរគរមូលធនពីសាធារណជន ឫអ្នកវិនិយោគមូលបត្រ ដើម្បីឆ្លើយតបទៅនឹងតម្រូវការហរិញ្ញវត្ថុសម្រាប់ការវិនិយោគនៅកម្ពុជា។

បេសកម្ម៖ ស.ឈ.ឧ.ក. មានបេសកកម្មលើកស្ទួយ និងអភិវឌ្ឍវិស័យមូលបត្រនៅព្រះរាជាណាចក្រកម្ពុជា ព្រម ទាំងអនុវត្តសកម្មភាពដោយសហការជិតស្និទ្ធជាមួយនិយ័តករមូលបត្រកម្ពុជា និងជាច្រកទំនាក់ទំនងជាមួយ លើកកម្ពស់ការគ្រប់គ្រងទីផ្សារមូលបត្រឲ្យមានប្រសិទ្ធភាព និងជំរុញការអភិវឌ្ឍទីផ្សារនេះឲ្យមានសណ្ដាប់ធ្នាប់ និងរបៀបរៀបរយ។

គោលបំណង៖ ស.ឈ.ឧ.ក. ត្រូវបានបង្កើតឡើងក្នុងគោលបំណងដូចខាងក្រោម៖

• ជំរុញការធ្វើប្រតិបត្តិការអាជីវកម្មជើងសាឧបករណ៍និស្សន្ទរបស់សមាជិក ប្រកបដោយក្រមសីលធម៌វិជ្ជាជីវៈអនុលោមតាមច្បាប់ និងបទប្បញ្ញត្តិដែលមានជាធរមាន។
• ជំរុញការអនុវត្តច្បាប់និងបទប្បញ្ញត្តិនៅក្នុងអាជីវកម្មជើងសាឧបករណ៍និស្សន្ទព្រមទាំងបទ ប្បញ្ញត្តិពាក់ព័ន្ធផ្សេងទៀតដែលមានជាធរមាន របស់សមាជិក។
• បង្កើនប្រសិទ្ធភាពប្រតិបត្តិការអាជីវកម្ម តាមរយៈការបង្កើតស្តង់ដានៃការអនុវត្តអាជីវកម្មជើងសាឧបករណ៍និស្សន្ទ្រប្រកបដោយសមធម៌ក្នុងចំណោមសមាជិក។
• ធ្វើបច្ចុប្បន្នកម្មឱ្យទាន់ពេលវេលាដល់សមាជិកអំពីការអភិវឌ្ឍ និងបញ្ហាប្រឈមផ្សេងៗ តាម រយៈការបង្កើតជាយន្តការតាមដាន និងផ្សព្វផ្សាយច្បាប់ និងបទប្បញ្ញត្តិនៅក្នុងវិស័យមូលបត ព្រមទាំងបទប្បញ្ញត្តិពាក់ព័ន្ធផ្សេងទៀត។
• ជំរុញឱ្យមានការអប់រំ និងការផ្សព្វផ្សាយនូវព័ត៌មាន និងបច្ចុប្បន្នភាពនៃច្បាប់ និងបទប្បញ្ញត្តិពាក់ ព័ន្ធក្នុងវិស័យមូលបត្រសម្រាប់អាជីវកម្មឧបករណ៍និស្សន្ទដល់សាធារណជនគ្រប់រូបភាពតាមដែលអាចធ្វើបាន។
• លើកកម្ពស់ស្តង់ដាវិជ្ជាជីវៈរបស់បុគ្គលិកនៃសមាជិក តាមរយៈការរៀបចំជាវគ្គបណ្តុះបណ្តាល ពង្រឹងសមត្ថភាព និងការចែករំលែកបទពិសោធន៍។
• ផ្តល់អនុសាសន៍ និងលើកជាគោលនយោបាយដល់និយ័តករមូលបត្រកម្ពុជា (ន.ម.ក.) និងស្ថាប័នពាក់ព័ន្ធ ដើម្បីលើកស្ទួយការអភិវឌ្ឍអាជីវកម្មជើងសាឧបករណ៍និស្សន្ទ្រក្នុងវិស័យមូលបត្រ។
• លើកកម្ពស់ការប្រាស្រ័យទាក់ទងគ្នា ការចុះសម្រុងគ្នា និងការសម្របសម្រួលដើម្បីសម្រេចបាន ជាមតិរួមរវាងសមាជិក។
• តំណាងឱ្យផលប្រយោន៍រួមរបស់សមាជិកក្នុងការធ្វើទំនាក់ទំនងជាមួយបុគ្គល ឬស្ថាប័នពាក់ព័ន្ធ ខាងក្រៅ។
• ចូលរួមសកម្មភាពផ្សេងៗដែលគាំពារដល់គោលបំណងដែលមានចែកលក្ខន្តិកៈរបស់សមាគម។

គុណតម្លៃ៖

• ប្រកបដោយឆន្ទៈ៖ ធ្វើការប្រកបដោយមនសិការខ្ពស់មានគោលបំណងច្បាស់លាស់។
• មិនមាននិន្នាការនយោបាយ៖ មិនបម្រើឱ្យគណបក្សនយោបាយ។
• មិនរើសអើង៖ ស.ឈ.ឧ.ក. វិនិយោគិន សង្គមស៊ីវិល និងរដ្ឋាភិបាលចូលរួមធ្វើការជាមួយគ្នា។
• សហការ និងគាំពារ៖ រួមគ្នាដោះស្រាយបញ្ហា ចែករំលែកបទពិសោធន៍ ចំណេះដឹង និងព័ត៌មាន។
• គណនេយ្យភាព និងតម្លាភាព៖ ស្មោះត្រង់ទទួលខុសត្រូវចំពោះអ្នកទទួលផល និងដៃគូរអភិវឌ្ឍ។
• ពង្រឹងសមត្ថភាព៖ ការបណ្តុះបណ្ដាល និងពង្រឹងសមត្ថភាពជាមូលដ្ឋាន។

សមាគមឈ្មួញជើងសាឧបករណ៍និស្សន្ទនៅកម្ពុជា ទទួលបាន ​ការចុះឈ្មោះក្នុងបញ្ជីសមាគមសម្រាប់នីតិបុគ្គលនៅក្រសួងមហាផ្ទៃ នៅថ្ងៃទី៧ ខែឧសភា ឆ្នាំ២០២៤ ។

លេខអជ្ញាបណ្ណ៖ ២១៣៦ ប្រក